اهل الشمال دائما شايفين حالنا بالطبخ والنفخ والتفنن بالاكل..في منه .. الخضار وخيرات الجبال.. تقولو ستي وستك كانوا عنزات بهالوعر.. كل شي بيتلقط وبينطبخ.
ولما بدنا يعني نتزانخ بنقول اكل الجليل قريب من الاكل اللبناني.. والسوري.. الشامي كأنه بيصير انغش هيك ودلوع حليوه..
بديش احكي عن المثلث.. بعلق بدار حماي..
بس بدّي اعرفكم اليوم عالكنز التراثي المطبخي الموجود بمدن الساحل..
وتحديدا عن خالتو سميرة ربيع (ام ابراهيم) من الرمله
هاي المراه صرت احب اروح عن فيفيان بس عشان اشوف شو طابخه..
ولا مره اكله عالماشي.. كل مره شي طبخة نادره من مطبخ مدن الساحل من غزه/يافا/الرمله/اللد
رمانيه ، بُصارة، رقّية، صيادية جزر احمر محشي مع القراصيه..
هاي غير الحلويات
من الحمضيات وقشر الليمون والبرتقال، وقشر الكباد(بومله) وانواع النموره .
الله وكيلكم مكتبة طبخ فلسطيني مخبيه،
كل مره بترجى فيفيان خليها تعملنا ورشة طبخ ساحلي.. خلينا نوثق هالمعلومات يا بنت.. هاد عمل وطني غني بالسعرات الحراريه.
واحلى اشي لما ابو ابراهيم يدخل عالخط ويصير يتغزل بالطبخ ومن وين بيوصو عالمركبات النادره مثل البهارات والقراصية والتفاح البني الصغير اشي من نابلس واشي من برا.
اخر زياره، لاقيتها عامله جزر احمر محشي.. اشي رهيب حامض حلو ومالح مع بعض، ولا يشبه اي نوع محاشي آخر وبتعرفو انا خبيرة محاشي..
وحكت لي عن ذكريات موسم الجزر الاحمر من عزه يجي .. ازا ما عليه رمل غزة يعني مش مزبط، ويوصلوا عليه وصاه
وتاني يوم طبخت ام ابراهيم رقية (رقاق عجين مع زهرة ) وشكلها بيشهي.
كل اشي زاكي بأكل الساحل بس بعدني مش قادرة اتقبل اشي واحد
ومش خاشش مخي ولا معدتي..
كعك الزعتر الحلو ..
وما زال النقاش مستمر حول القضية المصيرية التي قد تسبب انشقاق الشعب الفلسيطني كله.
تسلم الايادي خالتو سميرة
وحطولنا لايك بالله
