عن دعوة ابو مازن الوزيرة ايليت شاكيد لزيارته!
بحسب صحيفة “هآرتس”، رئيس السُلطة الفلسطينيّة، أبو مازن قال لوزراء “ميرتس” إنّه منصور عبّاس تشاور معه قبل انضمامه للحكومة، وأبو مازن نصحه بالدخول للحكومة. فاهمين ؟ فاهمين شو عم يعمل أبو مازن ؟ أنا بقلّك شو عم يعمل من سنوات طويلة جدًا: عم يعاملنا، بشكل أداتي وسخ وعم يتاجر فينا، بفوّتنا ع حكومة إسرائيل، ع أمل يلاقي مين يزوره ويعبره إذا تبدّل نتنياهو.
بعرف بعرف، كثير ناس خايفة تحكي، كثير ناس بدهاش تحكي. بس أنا بدّي اقلكم: أبو مازن هو اللي دفع أيمن عودة والمُشتركة للتوصية ع غانتس؛ وهاي أبو مازن طلع كمان دافع منصور عبّاس يفوت ع الحكومة.
هذا أذى، هذا الإنسان بسيطرته عمنظّمة التحرير الميتة أصلًا، عم يستغل كُل إشي ممكن ليدمّرنا كُلنا كشعب بكُل مكان. مش انت يا أبو مازن اعتبرتنا باتّفاقيّة أوسلو إنّا شأن داخلي اسرائيليّ ؟ اتركنا ياخي، ابعد عنّا، إرفع إيدك عنّا. آه آه، بدناش تبيعنا، ولا تتعامل معنا بشكل أداتيّ، عشان تجرّب حظّك ييجي إسرائيلي يقبل يقعد معك. أقلكم شو عم يعمل أبو مازن ؟ بطّل ملاقي مين يقعد معه باسرائيل، بطّل في “معسكر سلام” بإسرائيل، صار بدّه يعمل الفلسطينيّة بالداخل مُعسكر سلام إسرائيليّ، يفوتوا حكومة ويوصّوا ع جنرال حرب، ويبيعوا فلسطين كُلها من أساسها، عشان يلاقي حدا يقعد معه.
إتركنا، ابعد عنّا، عنجد. هاي السُلطة، ضررها علينا كشعب، يفوق كُل إشي عملته إسرائيل فينا من الـ48 لليوم، عنجد بحكي. من الـ48، فش عنّا حزب فات ع الحكومة، ولا عنّا قائمة أوصت ع رئيس حكومة إلّا بحالتين: لمّا كانوا بدهم يوقعوا اتّفاق؛ ولمّا ما لاقت هاي السُلطة مين يقعد معها.
إحنا يا أبو مازن، مش إسرائيليّة، حتّى لو حملنا جواز السفر، وهاي منقلّك اياها بوضوح. وآه آه، ارفعوا إيديكم عن فلسطين والفلسطينيّة، يا قيادات روابط مناطق (أ)…
About The Author
