شوفوا…(مدونة رنا بشارة)
إحنا مِنحُب الغرب لما بيتعلّق الموضوع بالسّفر وشمّة الهوا والسّياحة والهجرة والهروب من الأوطان والبحث عن الأرزاق.
يا أخي…
الواحد يحكي يللي إله ويللي عليه…
أميركا حلوة وأوروبا بتجنن أكثر…
في أحلى من الطّلعة على بُرج إيفل فوق والتّجول في شوارع مانهاتن؟!
وبعدين يا عمّي في أميركا وأوروبا إنت سيّد نفسك…
بتعمل شو ما بدّك…
ما حدا ببيسألك وين إنتَ…
بتحكي سياسة…
بتعبّر عن رأيك بحُرّيّة…
بتنظم مُظاهرات ضد الرئيس إذا حبيت …
بتسُب وتشتم الزعماء وبتتمسخر عليهم في الصّحف إذا طق ببالك ما حدا إله حق يحاسبك أو يحُطّك في السّجن…
وطبعاً، إذا ناوي تهج من وطنك وتشتغل وتستقر في الغرب… يعني في أوروبا أو أميركا، الرواتب كثير أحسن من روسيا والصّين وكوريا الشّماليّة وإيران مثلاً.
ولا تنسى تعليم ولادك مجاني والطبابة مضمونة إلك ولكُل أسرتك…
وبعد كم سنة بتصير مُواطِن مُتساوي مثلك مثل أي مُواطِن أصلي تاني…
وإذا حبيت بحقّلّك ترّشح حالك للبرلمان والرّئاسة…
بَس طبعاً في الحروب الوضع بيختلف…
يعني إذا في حرب بين الغرب من جهة، وروسيا من جهة أخرى، ما لازم تتردد وتفكّر مرتين مع مين توقّف…
بتنسالي كُل حياة النّعيم والرّفاهية هاي في أميركا وأوروبا وبتصُف بدون اي تردد خلف الرّفيق بوطين…
خلف المحور المُمانع والمُناهض للمحور الإمبريالي الشيطاني يللي بضم أميركا وأوروبا…
هيّه هيك…
ما بدها سؤال…
الوقوف مع أميركا وأوروبا في الحروب خيانة عُظمى…مؤامرة على وطنك يللّي لهثت ليل نهار لتهج منه وتوصل على الغرب!
About The Author
