الشجرة

بلدنا بفلسطين إسمها الشجرة، وموقعها بالزبط بنصّ الطريق بين طبريّا والناصرة بعيدة عن كل مدينة حوالي خمسطعشر كيلومتر ..

طول عمري وأنا أسمع كباريّة البلد والبلاد جيراننا بالمخيّم يقولوا عنها السجرة، وحتّى أهلنا بالجليل لإسّه بيسمّوها السجرة، وحسب ما سمعت من حياة جدّي أبو هويّن اللّي عشت معو عشر سنين ونصّ واللّي ورّثني قول الشعر وأخذت عنّو تاريخ ومعرفة بيعادلو قرن وأكثر، واللّي صارلو حوالي الخمسين سنة متوفي الله يرحمهو ويرحم امواتكو إنّو هنّي بيقولولها السجرة لأنّو إسمها الأصلي السرياني “سَجَرَتَ” من أيّام سيّدنا عيسى، ومش بس هيك، كمان قال البلد أخذت إسمها من سجرة النخل اللّي قعدت تحتها ستّنا مريم وهي عم بتخلّف، واللّي أكّد لي جدّي إنّو شافها بعيونو قبل ما ينعمي بالجدري وهو عمرو أربع سنين، وهاي السجرة موجودة غربي البلد وجنبها في مغارة إكتشفها أخوه لجدّي وانعرفت بإسمو “مغارة ظاهر” وكل العالم ببلدنا والبلاد اللّي جنبنا بتعرف هالحكي ..

وكان حياة جدّي الله يرحمو كل مرّة تنفتح هالسيرة يقول: صحيح في بلد إسمها السجرة بالأردن ووحدة ثانية بحوران، بس بلدنا هي المقصودة لأنّ القرآن الكريم بيأكّد إنّو السجرة اللّي ولد تحتها سيدنا عيسى موجودة شرقي الناصرة، وبلدنا هي شرقي الناصرة، وهي الوحيدة بين البلاد اللّي حوالينا اللّي فيها دير قديم وكان فيها كم عيلة مسيحيّة قبل ما يهجّوا منها عالناصرة وعالأردن لأنّو واحد مسلم من البلد خطف وحدة منهم خطيفة وتزوّجها قبل النكبة ..

هلأ صحيح إنّو هاد حكي بحكي وشكلو مثل خرّافيّات العجايز، وفوق هيك مش موثّق كمان، بس أنا مصدّق كل كلمه فيه، وحتّى خالي أبو مأمون الله يطوّل بعمرو قال لي مرّة: يا خالي هذا الكلام مذكور بكتاب لباحث إنكليزي وحلف إنّو هو قراه بعيونو لمّا كان سفير فلسطين بمالطا ..

إسّه ما إلكو بالطويلة ..

الحاصلو إنّو المسيح انولد ببلدنا وبعدين راح على بيت لحم، ولمّا رجع عشان يمشي فوق بحرة طبرّيا رد مرّ ببلدنا وارتاح تحت السجرة اللّي أخذت بلدنا إسمها منها، اللّي مصدّق هالحكي أهلا وسهلا فيه، واللّي مش مصدّق بخاطرو!! .. بدهاش زعل الشغلة ..

بس أنا بهالمناسبة بحب أقول للجميع:

كلّ عام وإنتو بألف خير .. وميلاد مجيد للجميع ..

اللوحة للفنّان الفلسطيني المرحوم إسماعيل شـمّوط وإسمها (فلسطين على الصليب)، ولمّا وعيت عالدنيا بمخيم العائدين بحمص قبل ستّين سنة كانت معلّقة عالحيط تحت سقف الزينكو ببيتنا بالمخيّم .. وأخذناها معنا لمّا انتقلنا عاليرموك ويمكن بعدها موجودة لهلّأ تحت أنقاض البيت ..

تحيّاتي ومحبّتي للجميع ❤️